Kiçik və Orta Biznesin İnkişafı Agentliyi (KOBİA) yanında İctimai Şuranın yeni tərkibinin formalaşdırılması ilə əlaqədar üzvlüyə namizədlərin qəbulu elan edilir. KOBİA yanında İctimai Şuranın fəaliyyətində üzv kimi iştirak etmək istəyən biznes assosiasiyaları və birlikləri, vətəndaş cəmiyyətini təmsil edən və əsas fəaliyyəti sahibkarların hüquqlarının təbliği və qorunması olan, bu sahədə geniş təcrübəyə malik ixtisaslaşmış vətəndaş cəmiyyəti institutları öz namizədləri barədə Agentlik tərəfindən formalaşdırılmış Seçki Komissiyasına müraciət edə bilərlər. Hər bir vətəndaş cəmiyyəti institutu ictimai şuranın üzvlüyünə yalnız bir namizəd irəli sürə bilər.
Seçkilər Seçki Komissiyasının müəyyən etdiyi tarixdə və yerdə keçiriləcəkdir.
Müraciət etmək üçün tələb olunan sənədlər:
- Namizədin ərizəsi;
- Namizədin şəxsiyyət vəsiqəsinin surəti;
- Namizədin təmsil olunduğu vətəndaş cəmiyyəti institutunun qeydiyyat şəhadətnaməsi və reyestrdən çıxarışının surəti (əgər varsa);
- Müraciət etmiş vətəndaş cəmiyyəti institutunun İctimai Şurada təmsil olunmasını istədiyi nümayəndə barədə həmin və ya digər vətəndaş cəmiyyəti institutunda onun üzvlüyünü (rəsmi vəzifəsini) (əgər varsa) təsdiq edən sənəd və İctimai Şuraya rəsmi olaraq üzv qəbul edilməsini tövsiyə edən məktub;
- Namizədin müvafiq sahə üzrə təcrübəyə və ya biliyə malik olmasını sübut edən sənəd (olduğu halda əmək kitabçasının və digər təsdiqedici sənədlərin surəti).
Yuxarıda qeyd edilən sənədlər 25.11.2024-cü il saat 18:00-dək kağız daşıyıcıda KOBİA-nın Bakı şəhəri, Nərimanov rayonu, Atatürk prospekti, 134 ünvanında yerləşən inzibati binasına gəlməklə və ya elektron formada ictimaishura@smb.gov.az elektron poçt ünvanına göndərilməklə təqdim edilə bilər.
Vətəndaş cəmiyyəti institutuna və onun irəli sürdüyü namizədə dair tələblər aşağıdakılardır:
- vətəndaş cəmiyyəti institutunun aktiv fəaliyyətinin olması;
- namizədin məhkumluğu olduğu təqdirdə onun götürülmüş və ya ödənilmiş olması.
İctimai Şuraya namizədliyini irəli sürmüş şəxsin qeydiyyatına Seçki Komissiyası tərəfindən baxılacaq və nəticəsi barədə müvafiq qərar qəbul edilərək müraciətçiyə məlumat veriləcəkdir.
Əlavə məlumat üçün: (012) 404 04 01 (daxili 247).
Qeyd: 2018-ci ildən etibarən fəaliyyət göstərən KOBİA yanında İctimai Şura qurumda ictimai iştirakçılığı təmin etməklə, kiçik və orta biznesin inkişafı ilə bağlı görülən tədbirlər və KOBİA-nın fəaliyyətinə ictimai nəzarəti həyata keçirir. İctimai Şuranın üzvlərinin say həddi 15 nəfər olmaqla Seçki Komissiyası tərəfindən müəyyən edilmişdir və Şuranın tərkibi 2 ildən bir keçirilən seçkilər vasitəsilə formalaşır. KOBİA yanında İctimai Şuraya sonuncu dəfə seçkilər 2022-ci ildə keçirilmişdir.
Powered by Froala Editor
